ಬಾಲ್ಯದಿಂದಲೇ ರಂಗೋಲಿ ಪ್ರದರ್ಶನ ಸಂಗ್ರಹ ಎಂದಾಗ ರಂಗೋಲಿಯಲ್ಲಿ ಏನಿದೆ? ಅದರ ಹಿಂದೆ ಯಾಕೆ ಹೋಗ್ತೀರಿ? ಬೇರೆ ಕ್ಷೇತ್ರ ಆಯ್ಕೆ ಮಾಡಿಕೊಳ್ಳಿರಿ ಎಂದು ಅನೇಕರು ಸಲಹೆ ನೀಡಿದ್ದರು . ಆದರೆ ಅದೇನೂ ಗೊತ್ತಿಲ್ಲ. ಸಾಕಷ್ಟು ನೋಡುಗರು ಮೆಚ್ಚುವಂತೆ ಕಲೆಯನ್ನು ಪ್ರದರ್ಶಿಸುವ ಅವಕಾಶಗಳು ದೊರೆತವು. ರಂಗೋಲಿಯ ಬಣ್ಣಗಳು ಗೆರೆಗಳು ಕಲಾ ಆಸಕ್ತರನ್ನು ಆಕರ್ಷಿಸಿದವು. ರಂಗೋಲಿಯನ್ನು ಬಣ್ಣಗಳ ಮೂಲಕ ಮತ್ತು ಅದನ್ನೇ ಕ್ಯಾನ್ವಾಸ್ ನಲ್ಲಿ ರಚಿಸಿದ ಪ್ರಯೋಗಗಳು ನನಗೆ ಯಶಸ್ಸನ್ನು ತಂದುಕೊಟ್ಟವು. ಕಲಾ ಪ್ರದರ್ಶನ ಮಾಡಿದ ಕೆಲವೇ ತುಣುಕುಗಳನ್ನು ಇಲ್ಲಿ ನೋಡುಗರಿಗೆ ತೆರೆದಿರಿಸಿದ್ದೇನೆ. ನೋಡುಗರು ಮೆಚ್ಚಿಕೊಂಡರೆ ಜೀವನ ಸಾರ್ಥಕ. —— ಡಾ.ಭಾರತಿ ಮರವಂತೆ
ರಂಗೋಲಿ ಪ್ರದರ್ಶನ :
ಉಡುಪಿ ಜಿಲ್ಲೆಯ ಮಹಿಳಾ ವೇದಿಕೆ ಕೂಟ ಮಹಜಗತ್ತು, ಇನ್ನರ್ ವ್ಹಿಇಲ್ ಕ್ಲಬ್ ಸಾಲಿಗ್ರಾಮ ಇವರು ೨೦೧೮ರಲ್ಲಿ ರಂಗೋಲಿ ಉತ್ಸವ ಎನ್ನುವ ಕಾರ್ಯಕ್ರಮವನ್ನು ಆಯೋಜಿಸಿದ್ದರು. ಈ ಸಂದರ್ಭದಲ್ಲಿ ನಾನು ರಚಿಸಿದ ರಂಗೋಲಿಗೆ ಅತಿಥಿಗಳ ಮೂಲಕ ಚುಕ್ಕೆ ಇಟ್ಟು ದೀಪ ಬೆಳಗಿಸುವುದರ ಸಂದರ್ಭದ ಛಾಯಾಚಿತ್ರ . ಕಾರ್ಯಕ್ರಮ ಆಯೋಜಿಸಿದ ಅಧ್ಯಕ್ಷರು ಮತ್ತು ಸದಸ್ಯರಿಗೆ ಧನ್ಯವಾದಗಳು.-ಭಾಮ ೨೦೦೬ರಲ್ಲಿ ಉಡುಪಿ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ನಾನು ರಚಿಸಿದ ರಂಗೋಲಿ ಇದಾಗಿದೆ. ಅಂದು ನನ್ನ ಈ ರಂಗೋಲಿಯನ್ನು ನೋಡಿ ಕರಾವಳಿಯ ಎಲ್ಲಾ ಪತ್ರಿಕೆಗಳೂ ಸುದ್ದಿಯನ್ನು ಬಿತ್ತರಿಸಿದ್ದು ಅಂದು ನನಗದು ಈ ಕ್ಷೇತ್ರದಲ್ಲಿ ಬೆಳೆಯಲು ಪ್ರೇರಣೆಯಾಗಿದೆ -ಭಾಮ . ರಂಗೋಲಿ ನಮ್ಮ ದೇಶದ ನೆಲಮೂಲ ಸಂಸ್ಕೃತಿಯ ಕಲೆಯಾಗಿದೆ. ಈ ಕಲೆ ಸಂಪ್ರದಾಯದ ಚೌಕಟ್ಟಿನಲ್ಲಿ ಗ್ರಾಮೀಣ ಪ್ರದೇಶದ ಜನರಲ್ಲಿ ಬೆಳೆದು ಬಂದಿದೆ.ಈ ರಂಗೋಲಿ ಕಲೆಯನ್ನು ಉಳಿಸಿ ಬೆಳೆಸುವ ನೆಲೆಯಲ್ಲಿ ಹೊಸ ಪ್ರಯೋಗದ ಫಲವೇ ೨೦೧೮ರಲ್ಲಿನ ಬೆಂಗಳೂರಲ್ಲಿ ರಂಗೋಲಿ ಕಲಾ ಪ್ರದರ್ಶನ. ಕೆಂಪೇಗೌಡ ಸ್ಥಾಪಿಸಿದ ಬೆಂಗಳೂರಿನ ಇತಿಹಾಸದಲ್ಲಿ ಕೆಲವೊಂದು ಸಂಗತಿಗಳನ್ನು ಮಾತ್ರ ಇಟ್ಟುಕೊಂಡು ರಚಿಸಿದ ರಂಗೋಲಿ ಇದಾಗಿದೆ.ಕಾರ್ಯಕ್ರಮವನ್ನು ಆಯೋಜಿಸಿ ನನ್ನ ಹವ್ಯಾಸಕ್ಕೆ ಇನ್ನಷ್ಟು ಪ್ರೇರಣೆ ನೀಡಿದವರು ಬೆಂಗಳೂರಿನ ಡೆಸ್ಟಿನೇಷನ್ ಹೆರಿಟೇಜ್ ರೂವಾರಿಯಾದ ಪ್ರೊ.ಗೀತಾ ಯು. ಬಡಿಕ್ಕಿಲ್ಲಾಯ. ಕೆಂಪೇಗೌಡ ಬೆಂಗಳೂರು ನಗರವನ್ನು ರಚಿಸಿದ ರೀತಿ, ಆರಂಭದಲ್ಲಿ ೪ ಎತ್ತುಗಳನ್ನು ೪ ದಿಕ್ಕಿಗೆ ಬಿಟ್ಟಿರುವುದು, ಅರಮನೆ, ಕೋಟೆ, ಅಣ್ಣಮ್ಮ ದೇವತೆ , ಶಿಲಾಶಾಶನ, ವೀರಗಲ್ಲು, ಜಟಕಾ ಬಂಡಿ, ಬಸವನ ಗುಡಿ, ಕಬ್ಬನ್ ಪಾರ್ಕ್, ಕರಗ ಕುಣಿತ ಇತ್ಯಾದಿ ಸಂಗತಿಗಳನ್ನು ರಂಗೋಲಿ ಕಲೆಯಲ್ಲಿ ರಚಿಸಿದ್ದೇನೆ. ಈ ಕಾರ್ಯಕ್ರಮವನ್ನು ಆಯೋಜಿಸಿದವರಿಗೆ ಮತ್ತು ಅಂದಿನ ದಿನಗಳಲ್ಲಿ ವೀಕ್ಷಕರಿಗೆ ಬಿತ್ತರಿಸಿದ ಡಿ.ಡಿ.ಚಂದನ ವಾಹಿನಿ ಮತ್ತು ಇತರ ದೂರದರ್ಶನ ಚಾನೆಲ್ ನವರಿಗೆ ಆಭಾರಿಯಾಗಿದ್ದೇನೆ – ಭಾಮ
